Description

WENDOXAN RÊ
Wendoxê erjayeyî,
Na hûmara Vateyî hûmara verîna serra diyin a. Çar hûmarê mayê ke par vejîyaybî hem Ewropa de hem zî Tirkîya de çap bîy û Vate Tirkîya û taye cayanê Kurdîstanî de zî vila bî. Çîyo ke ma tewr zaf keyfweş keno no yo. 

Ma verî zî vatbî labelê ma newe ra vajî ke nê bes nîyê. Ma ganî (gerek) bixebitîye ke Vateyî hîna zaf çap bikerî û vila bikerî. Şima wendoxî zî ganî na xebate de ma rê ardim bikerî. 

Ewro ma bi zerweşîye vînenî ke Kurdîstan ra, Tirkîye ra û welatanê cîya-cîyayanê Ewropa ra wendoxî ma rê nusenî û piştî danî ma. No rewş (hal) ma hîna teşwîq keno ke ma karê hazirkerdene û vilakerdena Vateyî rê sûr bibî. 

Na hûmara ma de metnê netîceyanê Kombîyayîşê Pancinê Kirmanckî (Zazakî) esto. Seke şima nê metnî de vînenî ma roj bi roj ver bi kirmanckîya standarde gaman erzenî. Ma hêvî kenî ke wendox û nuştoxî hem netîceyanê kombîyayîşanê kirmanckî hem zî nuşteyanê (yaziyanê) bînan bi dîqqet biwanî û nînan ser o munaqeşe bikî, fikranê xo ma rê zî binusî. 

Bi na hêvî ma weşî û şayîya şima wendoxan wazenî.