Açıklama

WENDOXAN RÊ

Wendoxê ma yê delalî, 

Yewna hûmara ma ya dewletî (zengîne) ha destê şîma de ya. 

Vejîyayîşê hûmara 27. ra pey Derheqê Kirmanckî (zazakî) de Kombîyayîşê Çarêsine bi. Ma nê kombîyayîşî de 500 ra zafêr çekuyanê kirmanckî ser o vindertî. Netîceyê nê kombîyayîşî na hûmara ma de estê. 

No beyntar de Weşanxaneyê Apecî gamêka muhîme eşte, panc kitabê domanan (gedeyan) bi kirmanckî neşr kerdîy. J. Îhsan Esparî nê kitabê Gunilla Wolde swêdkî ra tadayî (çarnayî). Weşanxaneyê Apecî, 1997 de zî çar kitabê domanan ê ke Haydar Diljenî tadabîy, neşr kerdîbîy. Hêvîya ma a ya ke ewro ra pey zî kitabê winasî neşr bibîn. 

Na hûmare de şima haydarîya (agahdarîya) ÎKKyî wanenî. Seke uca de nusîyayo, no enstîtu serrgêra hewtayine ya şehîdkerdişê Sey Rizayî û embazanê ey, bi dayîşê xelata (halêta) şîîr û hîkayanê kirmanckî yad keno. Ma hêvî kenî ke şaîr û edîbê ma bi şîîr û hîkayanê xurtan beşdarê na musabeqa bibîn. 

Qapaxê peynî yê na hûmara ma de fotografêko balkêş û nayab esto ke wextê “Herbê Şêx Seîdî” (1925) ra mendo. Mustafa Ayzîtî çend serrî ra ver no fotograf dayo Malmîsanijî. Keyeyê nê dostê erjayeyî awan bo. Goreyê Mustafayî, no fotografê yew kurdî yo ke eskeranê tirkan hêsîr kerdo. Seke aseno, no xorto hêsîr bi rêzile (zincîre) beste yo. 

Nuştoxê ma yê hepsî şertanê zoran mîyan de zî xo ver ro danî û ma rê nusenî. Ma wazenî ke ewro ra pey zî ma rê binusîn. Heta ke mumkun bo ma wazenî ca bidî nuşteyanê înan. 

Şa û zerrîweş bimanîn.

Vate