Açıklama

WENDOXAN RÊ

Wendoxê mayê delalî, 

Na hûmare, bi netîceyanê kombîyayîşê peyên yê kirmanckî yê Grûba Xebate ya Vateyî dest pêkena. Nê netîceyan de, hem rastnuştişî ser o melumat esto hem zî tayê çekuyî ameyê pêşkêşkerdiş. Yewna xususîyetê nê kombîyayîşî zî no yo ke, kombîyayîş Dêrsim de bi. Grûba Xebate ya Vateyî, çar rojî Dêrsim de mende, bîye mêmanê Beledîyaya Dêrsimî. Kombîyayîşê Kirmanckî, hîrê rojî dewam kerd; dima seba şarê Dêrsimî kombîyayîşêk amade bi. Nê kombîyayîşî de Malmîsanij û Munzur Çem muhîmîya ziwanî û rewşa kirmanckî ser o vindertî, no ware de goşdari¬toxî goşdaritî û cewabê persanê înan day. Sereka Beledîya Edîbe Xanime û xebatkarê beledîya, bi mêmandarîya xo, seba piştgirîya xebata ziwanê dayîke bîy nimûneyêka başe. 

Nuşteyêkê bîn yê na hûmara ma de, behsê Yadoyî beno. Xebata xo ya derg û dilaye ra pey Ehmedê Dirihî, bi melumatanê neweyan, nê şe¬hîdê miletê ma dano naskerdiş. 

Bi nuşteyê Serwet Akkaşî, ma derheqê kirmancanê Qers û Erdexanî de zaf çîyan bander benî (musenî). Serwet, nuştoxanê ma yê hepsîyan ra yo. Murad Canşadî no nuşte resna bi ma. Keyeyê ey awan bo, Murad hem bi xo bi zîwanêko weş ma rê nuseno hem nuşteyanê winasîyan de beno hetkar (yardımcı). Nuşteyê Huseyîn Karakaş û Sînan Sutpakî zî hepisxane ra ameyî. Ma tîya nêşênê nameyê ê bînan hemîne binusî labelê ma nê hepsîyan hemîne rê cîya-cîya sipas kenê, selamanê xo înan rê şawenê. 

Na hûmara ma de, nameyê Ehmed Gurbuzî zî do bala şima bianco. Mamosta Ehmed, profesorê huqûqî yo. Ma zanî ke Tirkîya de akademîs-yenê kurdî zaf î, labelê reyna ma zanî ke kurdîya zafane yê nê akademîs-yenan tena bi name ya. Zafaneyê înan kurdîya xo înkar kenî; kurdîya xo înkar nêkî zî nîno vîrê înan ke rojêk bi ziwanê xo binusî, yan zî warê xo de bi xebata akademîke miletê xo rê xizmet bikî. Çi heyf ke mezgê zafaneyê nê tewir akademîsyenan mezgê îdeolojîya resmî yo. Ehmed Gurbuz, bi kirmanckînuştişê nê nuşteyê xo, bi îstîsnayêk. Ma hêvî kenî ke kesê winasî zîyade bibî. 

Nê nuşteyê ke ma behs kerd, nuşteyanê na hûmare ra tena çend heb î. Bêguman heme nuşteyan ser o yew bi yew vindertiş mumkin nîyo labelê şima do na hûmare de nuşteyanê balkêşan yê bînan û şîîranê şaîranê ma biwanîn. Boka (mela) şima înan ra tehm bigîrîn. 

Vejîyayîşê hûmara 33. a Vateyî ra pey, heta ewro da-des kitabê kirmanckî zî weşanîyay (neşr bîy). Tewr zafê nînan reyna Weşanxa¬neyê Vateyî vetî labelê Enstîtuya Kurdî ya Amedê bi hîrê, Enstî¬tuya Kelepûrê Kurdî-Şaxê Duhokê bi yew, Weşanxaneya Nûbi¬harê bi yew kitab, gamê neweyî eştê. Nê gamî merdimî şa kenî la bes nîyê, ganî gamê winasî yê bînî zî nê gaman taqîb bikîn. 

Wendox û nuştoxê hêcayî, 

Seba ke şima ziwanê xo ra tehm bigîrîn, ma endamê redaksîyonî no hîris û çar hûmarî yo ke wazenî bibî hetkar. Heta ewro aya ke destê ma ra ameya ma kerda. Bi piştgirîya şima wendoxan û nuştoxan, ma kovare amade kerda û pêşkêşê şima kerda. Ganî ma vajî ke keda Cemîl Gundoganî zî Vate de zaf a. Karê mîzanpajî tim ey kerd. Şima zanî, tayê merdimî estê ke wazenî nameyê înan tim bêro nuştiş, labelê bi eksê nê tewir merdiman yew xuyê Cemîlî yo “xirab” esto ke nêwaşt ma seba na keda ey nameyê ey kovare de binusî. (Camêrdê winasî zî estê!) 

Ma zerrîweş î ke ma no kar kerdo labelê sey karanê bînan, karê redaksîyonî zî ebedî nîyo. Merdim ewro karêk keno, meşte tayêna merdimî yenê nê karî domnenî. Karê redaksîyonê ma zî wina beno. Heta ewro ma no kar kerdo, na hûmare dima hevalanê ma ra Munzur Çem, Deniz Gunduz û Serdar Bedirxan do nê karî bidomnî. Ma û şima ganî ewro ra pey hetkarîya nê embazan bikîn ke vateyê hîna weşî bêrîn nuştiş. 

Weş biwanîn ke şima weşî bivînîn.

Vate