Description

WENDOXAN RÊ

Ma bixeyr dî wendoxê hêcayî, 

Hûmara Vateyî ya 34ine de embazanê ma derheqa redaksîyonî de nê cumleyî nuştîbî: 

“… Ma zerrîweş î ke ma no kar kerdo labelê sey karanê bînan, karê redaksîyonî zî ebedî nîyo. Merdim ewro karêk keno, meşte tayêna merdimî yenê nê karî domnenî Karê redaksîyonê ma zî wina beno. Heta ewro ma no kar kerdo, na hûmare dima hevalanê ma ra Munzur Çem, Deniz Gunduz û Serdar Bedîrxan do nê karî bidomnî…” 

Wendoxê delalî, 

Çitur ke embazan kî vato, sey redaksîyonê neweyî ma dest bi karê xo kerd û bi hûmara 35ine huzurê şima der îme. 

Her çî ra ravêr, ma wazenîme ke redaksîyonê verênî rê sipasîya xo nîşan bidîme. Vate, kar û xebata kirmanckî (zazakî) de gamêda tarîxî ya. Ramitişê na game de rolo sereke bêguman ê redaksîyonî bî. Nê embazanê ma bi serran, bi xebatêda pak û zelale, bi fedakarîyêda girse, 34 hûmarê kovare vetî û pêşkêşê şima wendoxan kerdî. Keyeyê înan awan bo, berxudar û weşûwar bê ê. 

Çiqas ke nameyê xo mîyanê endamanê redaksîyonî de nênusîyo kî mîzanpajê kovare bi destê embazê ma Cemîl Gundoganî ame viraştene. Seke redaksîyonî kî hûmara 34ine de vato, keda ey nê karî de zaf a. Ma ey rê kî sipas kenîme, destê ey weş bo. 

Heto bîn ra, şik çin o ke vurîyayîşê redaksîyonî, tena vurîyayîşê nobedaranê nê karî yo. Naye ra wet (dot), hetê naveroke ra Vate de qet çîyêk nêbedelîno. Prensîbê ke heta ewro Kavara Vateyî pê ama neşîrkerdene, ewro ra dime kî ma rê qilawuzîye kenê û rayîr (raye) nîşanê ma danê. 

Redaksîyono verên o ke heta ewro Vate amade kerdo, zaf tîtîz bî; no semed ra kî kovara ma hem hetê naveroke ra hem kî hetê rastnuştiş û mîzampajî ra serkewte vejîya û winî (henî) ame şînasnayene. Ma pê nê halî keyfweş û serberz îme labelê ma zanenîme ke no hal barê ma keno giran. Bi eynî kalîte vetişê kovarêk asan nîyo.

Redaksîyono newe de ma hîrê embazan ca girewto û ma cîya-cîya bajaran de ciwîyenîme. Nê bajarî yewbîn ra dûrî yê. No rîwal ra kî şansê ma çin o ke kombîyayîşan amade bikerîme, bêrîme têrî, qisey bikerîme. Eşkera yo ke no kî seba ma dezavantajêdo pîl o. 

Labelê ma bi şima wendoxan û bi taybetî kî endamanê redaksîyonî yê verênî bawer îme. Ma hêvîdar îme ke şima no kar de ma tena nêverdanê û Vate sey xizmetêda kolektîfe xizmeta ziwan û kulturê ma de rolê xo yo tarîxî ewro ra pey kî ano ca. 

Na çarçewa de wazenîme ke çend rîcayanê xo kî pêşkêşê şima bikerîme: 

1. Embazê ke seba weşanayîşî nuşteyan ruşnenê “Çitur bibo redaksîyon nuşteyê mi keno serrast” mevajê û çiqas ke destebere ra êno goreyê rastnuştişî binusnê. No, barê redaksîyonî keno sivik, kalîteya kovare kî keno berz. 

2. Tayê aboneyê ma, adresa xo bedelnenê/vurnenê labelê Vateyî haydar nêkenê. No sebeb ra kovarê ke bi poste înan rê şonê, peyser ênê. Ma hêvî kenîme ke ewro ra pey, aboneyê ma na derheqe de hassas hereket kenê û ma haydar kenê. 

3. Bêguman, weşanayîşê kovarêk muhîm o labalelê no tena bes nîyo. Seba ke merdim bireso armancê xo, ganî zor bido xo û çiqas ke besekerd/ eşkaya kovare hîra bikero vila, hûmara wendoxan bikero zîyade. 

4. Vate hetanî ewro bi heqa abonetîye û fedakarîya wendoxan û tayê embazan ciwîyo. No sebeb ra hetkarîya malî, seba vejîyayîşê Vateyî zaf muhîm a. Ma hêvî kenîme ke wendox û dostê Vateyî, naye kî xo vîrî ra nêkenê, seba ardimê malî çi ke destebere ra êno, pey de nêmanenê, kenê. 

Wendoxê hêcayî, 

Ma dest de xeylê nuşteyî estê û yew hûmare de weşanayîşê nînan mumkun nîyo. Zanayîş û tecrubeyê xo ra gore, ma nînan ra tayîne çînenîme we. Heto bîn ra bêguman no nîno o mane ke her nuşteyo ke ma rê ame, êno nêşîrkerdene. Ma na derheqe de kalîte û tayê prensîbanê bînan ser o kî cîddî vindenîme. 

Ma hêwî kenîme ke şima bi keyf û dilgermîye hûmara 35ine wanenê, ci ra tamêde baş gênê. 

Xeyr û weşîye de bimanê, berxudar bê!

Redaksîyon