Description

WENDOXAN RÊ

Wendoxê delalî,

Ma zaf keyfweş ê ke ma bi hûmara 70. ya kovara Vateyî pîya yê.

Hûmara yewine ya kovara Vateyî tebaxa 1997î de weşanîyaye. Kovare no 24 serrî yo ke bêmabên weşanê xo domnena. Ma wazenê derheqê nuşteyan û nuştoxanê Vateyî de tay melumat bidê şima.

Nê 70 hûmaranê kovare de nuşteyê 300 kesan ca gênê. Nê nuştoxan mîyan de ê ke eserê înan amey açarnayene 34 kesî yê. Hûmara 1. ra heta 33. nuşteyê 155 kesan amey weşanayene. Heta hûmara 50. 81 nuştoxî, hûmara 50. ra heta 60. 30 nuştoxî û nê des hûmaranê peyênan de zî 39 nuştoxî zîyade bîy. Ҫîyo balkêş û musbet o yo ke nuştoxê kovare yê cinî zî her perîyodî de zîyade benê. 70 hûmaranê kovare de 37 nuştoxanê cinîyan nuşto. Hûmaranê 1-33 de tena nuşteyê 7 cinîyan est bîy. Hûmara camêrdan 148 bîy.

Ma çend çekuyan zî derheqê nuşteyanê kovare de binusê. Kovare de şîîr û hîkayeyan ra teber ziwan, tarîx, kultur, folklor û gelek babetanê bînan ser o nuşteyî amey weşanayene: Mavajî 70 hûmaranê kovare de 479 şîîrî, 121 hîkayeyî, 101 roportajî, 98 sanikî, 77 meqaleyê edebî û kulturî, 215 fiqra û meseleyî, 35 cigêrayîşê ziwanî yan zî meqaleyê ziwan û gramerî, 47 nuşteyê vîrameyîşî, 31 portreyê kesan û sewbîna gelek bêj nuşteyî nusîyay. Nê 70 hûmarî 9007 rîpelî yê.

Wendoxê delalî,

Xelata hîrêyine ya kovara Vateyî 19.12.2021 de Dîyarbekir de, bi yew merasimî ameye eşkerakerdene û dayene. Na hûmare de şima verê xebera nê merasimî wanenê. Şîîra Îdris Yazarî ke xelata yewine û ya Îrfan Sîmserkîsijî ke xelata dîyine girewta na hûmare de neşr benê. Di şîîrê açarnayeyî û yew şîîra Gawanê Welatî zî na hûmare de est ê. Ma weşanayîşê xebata etîmolojî ya M. Malmîsanijî na hûmare de zî domnenê. Pinar Yildiz nuştoxîya Faulknerî ser o, Menekşe Akalin zî derheqê depresyonê leyîran û ciwanan de nuşto. Hîkayeyê na hûmare Mehmud Nêşiteyî û Akman Gedîkî nuştê. Mistefa Gomayij û Îsmet Bor bi nuştişê çend meseleyan na hûmare de zî ma reyra yê.

Heta hûmara bîne bimanê weşîye de!

Redaksîyon