Açıklama
WENDOXAN RÊ
Wendoxê birêzî,
Bi na hûmare Vate dekeweno serra hîreyine. Şima zî vînenê ke serrî çi leze vêrenê! Serrî rew vêrenê labelê serrê ke bi kar û xebate vêrê hîna weş ê, vîrê merdimî ser o hîna zaf tesîr kenê.
Redaksîyonê Vateyî, nê di serranê vîyarteyan mîyan de, bi ardimê nuştoxan, berpirsiyaranê Vateyî û embazanê bînan her hîrê mengan (aşman) de reyê Vate şima resna. No kar karanê ma yê tewr şadkerdoxan û tamdaran ra yew bi.
Na hûmare de ma netîceyanê Kombîyayîşê Şeşinê Kirmanckî (Zazakî) neşr kenê. Bi nê netîceyan, kirmanckî de, ver bi standardîzebîyayîş yewna gama muhîme erzîyêna.
Hetanî ke ma dest ra ame ma waşt ke her hûmare de nuşteyanê neweyan û hêcayan şima resnê. Ma hêvîdar ê ke na serra hîreyine de zî ma her hûmare bi nuşteyanê kalîteyinan şima resnê.
Çend mengî ra pey ma dekewenê serra 2000an. Na serra 2000an de ê şarî zaf çîyê xo esto labelê şima wendoxê delalî bifikirîyê (duşunmîş bibê): Tarîx de û ewro, se kurd çend Vateyê şima estê? Raya pawitiş, standardîzekerdiş û averberdişê kirmanckî (zazakî) de çend gamî sey Vateyî estê? Ma cewabê şima texmîn kenê.
Madem ke wina yo, şima yê ke wazenê Vate bivejîyo şima hetanî ewro piştîdayiş de texsîr nêkerd, ewro ra dime zî mekerê, ma xo vîr a mekerê û piştîdayoxanê neweyan peyda bikerê!
