Açıklama

WENDOXAN RÊ

Wendoxê hêcayî,

Ma newe ra pîya yê. No mabên (beyntar) de hûmara 13 û 14. a Vateyî Tirkîya de newe ra neşr bîy û welat resay.

Seke ma hûmara 16. de nuştbi, ma na hûmara de kitabê Mela Muhemmedê Hezanî (Mem), Eqîdetu’l-Îmanî newe ra neşr kenî. No kitab 1981 de bi herfanê erebkî nusîyayo labelê tîya newe bi herfanê latînkî vejîyêno.

Di şîîrê Mela Kamilê Puexî, Çewlîgî ra resay ma. Şima na hûmare de nê şîîran zî wanenî.

Nuşteyê ke welat ra yenî vera-vera vêşî benî. Zafaneyê (vêşaneyê) nuşteyan û roportajanê na hûmara ma welat ra ameyî. Ma seba naye keyfweş î, çunke çimeyê Vateyî welatê ma yo.

Aşmanê (menganê) peyênan mîyan de çend kitabê kirmanckî yê neweyî vejîyayî. Redaksîyonê ma ra J. Îhsan Espar na hûmare de nê kitaban bi şima dano şinasnayîş (naskerdiş).

Qapaxê peyên ê hûmara ma ya 16. de yew fotograf bi. Ma binê fotografî de nuştbi “Yado û Ado“. Tayê wendoxanê ma yê hessasan ma pê hesnay ke keso ke nê fotografî de Yadoyî het o Ado nîyo labelê Husî Begon o çewlîgij o. Wa nê wendoxê ma yê hessasî berxudar bî ke ma naye ra haydar (agahdar) kerdî.

Şima zî fikr û rexneyanê xo ma rê binusî, wa Vate de vateyê şima zî bibo.

Vate