Description
WENDOXAN RÊ
Wendoxê hêcayî,
Derheqê Kirmanckî (Zazakî) de Kombîyayîşê Desine, 30. 07. 2002 de Stokholm de dest pêkerd û hewteyêk ramit. Nê kombîyayîşî de nêzdî 500 çeku û termî (kelîme û deyîmî) tesbît bîy. Şima na hûmara ma de netîceyanê nê kombîyayîşî wanenî. Bi nê kombîyayîşan karê standardîzebîyayîşê kirmanckî (zazakî) game bi game raver (aver) şono. Ma bi xo bi nê çeku û termanê tesbîtbîyayeyan nusenê û hêvî kenê ke nuştoxê kirmanckî pêro wina binusî. Bêguman ma nuştoxanê ke tenya semedê dewijanê xo nusenê ra nêvanê, nuştoxê ke ma xîtab kenê ê yê ke wazenî wendoxê mintiqayanê bînan zî nuşteyanê înan ra fam bikî.
Na hûmara ma de zî keda (emegê) nuştoxanê ma yê ke welat ra nusenê zaf a. Roportajê Yekta Lezgînî Dîyarbekir ra, yê W. K. Merdimînî Çewlîgî ra yeno.
Na hûmare de, ma “Yûsuf û Zelîxa” ya Mela Mehmed Elî Hunî (Muhemmed Elî Öztürk) neşr kenê. Bi nuşteyê Mehmet Uzunî şima do (ko) nê şaîrî hîna (deha) weş bişinasnê (nas bikî).
Çend nuştox û şaîrî reya verêne (ewilî) Vateyî rê nusenê, sey Nevzat Gedîk û Cemîl Oguzî. Ma înan ra vanê “Şima bi xeyr ameyî”.
Ma hêvî kenê ke şima nuşteyanê na hûmare ra hîna zaf tam (lezzet) bigîrê.
Ma anê vîrê wendoxanê ke Internet de kovara Vate û Xebata Grûba Vateyî taqîb kenê ke keyerîpelê (homepage) ma ameyo newekerdene. Adresa nê rîpelî wina ya:
www.vateonline.com
Weşîye de bimanî.
Vate
