Description
WENDOXAN RÊ
Wendoxê mayê birêzî,
Hûmara ma ya 30. seba wanîyayîşî ha destê şima de ya. Ma des hûmaran de reyê fîhrîstê kovara Vateyî neşr kenî. Sey hûmara 10. û 20., na hûmara ma de zî fîhrîst esto. Fîhrîstê 30 hûmaran. Nê fîhrîstî de aseno ke nuştox û wendoxanê ma, kamcîn hûmare de çi nuşto. No fîhrîst, bi kilmîye xebata ma û şima ya 10 serran musneno.
Na hûmara ma de gelek şîîr û nuşteyê bînî zî estê. Boka (mela) bi zerrîya şima bîn.
Ma wazenî çîyêna bîyarî vîrê wendox û nuştoxanê Vateyî: Tayê wendoxî û nuştoxî, ma rê bi dest nusenî. Wina fam beno ke îmkanê nê kesan çin o ke bi komputure yan zî daktîlo binusî, bi dest nusenî. Ma naye fehm kenî labelê nuşteyanê nê embazan ra yê tayêne nînê wendiş. Şima zanî, ge-ge eke cumleyêk yan zî nuşteyêk ra çekuyêk zî vejîyo manaya tekstî herimîyêna (xeripîyêna). Ma nêwazenî nuşteyê kesî sirf seba ke bi dest nusîyayo neşr nêkî labelê eke ma nêşêna (bese nêkerd) biwanî, ma bêçare manenî ke nê tewir nuşteyan neşr nêkî. Şima yê ke bi dest nusenî, xeyrê xo nuşteyê xo wina binusîn ke wa (va) bi asanî (rehetî) bêro wendiş. Şima rê zehmet nêbo bi nuşteyê xoyê weşî karê ma zî asan bikîn.
Weşîye de bimanîn.
Vate
