Description
WENDOXAN RÊ
Wendoxê delalî,
Na hûmara ma Newroza 2003yî dima vejîyêna. Wa newroza şima pîroz (bimbarek) bo.
Na hûmare de zî ma çend eseranê menzûman ê şaîranê kirmancan (zazayan) resnenê şima. “Mewlidî Nebî” yê Mela Kamilê Puexî û “Weq’ey Kerbelay” a Mela Mehmed Elî Hunî (Hacî Xoca Muhemmed ’Elî Öztürkî) nînan ra yê. Nê eserî musnenê (nawnenê) ke şarê ma mîyan de, tay zî bibê eserê nuşte yê çapnêbîyayeyî (basılmamış) estê. Eke eserê winasî (inasarênî) bikewê destê ma, ma ewro ra pey zî wazenê neşr bikê.
Roportajê Mûnzûr Çemî û çend hîkayeyê balkêşî zî na hûmara ma de estê. Nînan ra “Xewf”ê Huseyîn Karakaşî, Hepisxaneyê Bartinî (Bartın Cezaevi) ra yeno. Winî aseno ke hepsîyanê kirmancan (zazayan) ra, kesê ke kirmanckî ser o xebitîyênê (gureyênê) û eseranê edebîyan nusenê estê. Hêvîya ma a ya ke na xebata hepsîyan, kirmancanê teberî rê zî bibo nimûne û ê ziwanê xo ser o hîna zaf bixebitê.
Ma anê vîrê şima wendoxan ke heme 18 hûmarê Vateyî Tirkîya de zî neşr bîy û kitabrotoxan (kitabçîyan) de estê. Şima şenê (bese kenê) nas û dostanê xo naye ra xeberdar bikê.
Weşîye de bimanê.
Vate
