Açıklama
WENDOXAN RÊ
Wendoxê delalî,
Na hûmare hûmara ma ya vîstine ya ke vejîyêna. Beno ke şarî rê vîst hûmarî zaf nîyê la kirmanckî (zazakî) de vîst hûmarî, yanî pêsero 2200 ra zafêr rîpelî tay nîyê.
Bêguman ma zanê, eke bêkalîte bibo zafîya rîpelan tenya zaf çî îfade nêkena. Coka ma heta ewro xebitîyayîme ke hetê kalîteyî ra Vate hol bibo. Ma do ewro ra pey zî seba naye bixebitîme.
Vate welat ra zaf dûrî, Stokholm de vejîyêno labelê ma Îstanbul de newe ra neşr kerd û hem Tirkîya de hem zî welat de vila kerd. Çîyo tewr (en) zafo ke ma pê şa benîme zî no yo. Çunke kam çi zano, beno ke tay zî bibo tesîrê Vateyê ewroyênî cagirewtiş û averşîyayîşê ziwan û edebîyatê mayê meştênî ser o bibo!
Nê vîst hûmaran de keda temsîlkar, nuştox, abone û wendoxanê Vateyî zaf a. Ma, ê dostanê ke hetê maddî ra piştgirîya Vateyî kerda zî xo vîr ra nêkenîme.
Ma fîhrîstê vîst hûmaranê Vateyî amade kerd. Na hûmare de şima nê fîhrîstî de nameyê nuştoxan û nuşteyanê heme vîst hûmaran vînenê. Nûşteyanê bînan het netîceyê “Kombîyayîşê Yewendesinê Kirmanckî (Zazakî)” zî na hûmare de estê. Hêvîya ma a ya ke şima nuşteyanê na hûmare ra tam bigîrê.
Vate
