Description
WENDOXAN RÊ
Wendoxê delalî,
Na hûmara ma de mizgîna abîyayîşê Buroyê Vateyî yê Dîyarbekirî esta. Na mizgîne, ma zerrîweş kerdîy. Boka (mela) meşte inasar mizgînî, şaristananê bînanê ma ra zî bêrîn.
Roşan Lezgînî zanyarê erjayeyî Îsmaîl Beşîkçî de qalî kerd. Beşîkçî reyna fikranê xo raste-rast vano, kolonyalîstan û hemkaranê înan efû nêkeno. Na hûmare de şima reya verêne fikranê ey bi kirmanckî (zazakî) wanenîy.
Nuşteyanê na hûmare ra yew Sadîyê Telheyîyê rehmetî ser o yo. Nê nuşteyî de, xeletîyêka Vateyî ya ke hûmara 16. de bîya zî -berey (herey) zî bibo- yena rastkerdiş.
Roportajêko ke “Ferman”ê armenî de bîyo zî na hûmare de yo. Şima nê roportajî de trajedîya merdimêk, keyeyêk, miletêk wanenîy.
Munzur Çemî gêrayîşê xo yê Pekînî dima, întîbayê xo nuştîy. Sayeyê nê nuşteyê ey de, derheqê Çînî de zanayîşê ma bineyna (tenêna) vêşî benîy.
Weşanxaneyê Vateyî neşrkerdişê kitabanê kirmanckîyan domneno. Nê hamnanî kitabê embazê ma J. Îhsan Esparî û Murad Canşadî neşr kerdîy. Murad peyê beran de yo, Weşanxaneyê Vateyî hol keno ke nuştoxanê hepsîyan xo vîr a nêkeno.
Nuştoxanê ma yê bînan zî bi nuşteyanê xo na hûmare dewletî (zengîn) kerda.
Weş biwanîn, weşîye de bimanîn.
Vate
