Description

Huseyîn Karakaş qezayanê Sêwasî ra Kangal de, yew (jû) dewe de maya xo ra bîyo. Çarês (des û çar) serrîya xo de şîyo Îstanbul. Îstanbul de hetê ra karanê cîya-cîyayan de se karker xebitîyayo û hetê ra kî mîyanê faalîyetê sendîkayan û xoverrodayîşê karkeran de ca girewto. Çepgirîya tirkan ra dime mîyanê xoverrodayîşê şarê xo de cayê xo girewto. No sebeb ra dekewto hepis û cezaya idamî girewta. Nika zî hepisxaneyê tirkan de yo.

Nê kitabî de hîkayeyê Huseyînî estê. Hîkayeyê ke ey hepisxane de nuştî. Nê hîkayeyanê xo de o behsê cuyê (heyatê) dewijan, kedkaran (emegdaran) û yew kurdê binê kilîtan, yanî yew hepsî keno. Bi ziwanêko weş tekilîyan û derdanê înan îfade keno.

Huseyîn hîkayenuştiş de gelek ciraameye yo. Tena bi kirmanckî ney, bi tirkî zî hîkayeyî nuştî. Ey seba hîkayeya xo ya bi tirkî, Musabaqaya Hîkaye û Şiîranê Tirkî ya Desine ya Hüseyin Çelebi de xelata diyîne girewta.

Huseyîn rast vano: Omid esto. Hêvî esta.