Description
WENDOXAN RÊ
Wendoxê mayê delalî,
Na hûmara Vateyî de zî giranî ziwan û edebîyatî ser o ya. Şîîr û hîkayeyan het, na rey çend nuşteyî rûmet û ehemîyetê ziwanî ser o, bi taybetî zî ziwanê standardî ser o vindenî. Hêvîya ma a ya ke şima hemîne biwanîn û înan ra tahm bigîrîn.
Bêguman cu (heyat) bi xo tena ziwan nîyo û ma rê tena ziwanî ser o ney, wareyanê cîya-cîyayan de zî nuşteyî lazim î. Sey nuşteyê Serdar Bedirxanî yê na hûmare.
Na hûmare de çendna nuştox û açarnayoxê (tadayoxê) neweyî Vate de nusenî. Ma ewro zî meşte zî pabeyê nuşteyan û nuştoxanê neweyan î.
Xeberêka ke rîpelanê peyênan ê na hûmare de neşr bîya zî musnena ke êdî welat de aktîvîteyê edebî benî. Nê xebatî welat de, kirmancan mîyan de newe yî la lazim î. Ganî roj bi roj hîna zaf bibî. Eke ma bi xo ziwan û nuştoxanê xo rê wayîr nêvejîyî, kam vejîno?
Ma anî vîrê şima ke adresa Vateyî vurîyaya (bedilîyaya). Adresa newîye, rîpelê verênê na hûmare de ya.
Weşîye de bimanîn.
Vate
