Description

WENDOXAN RÊ

Wendoxê delalî, 

Çapbîyayîşê na hûmara ma ra ver, Grûba Xebate ya Vateyî, Kurdis¬tanê Başûrî de beşdarê konferansêkê tarîxî, Konferansê Kirmanckî (Zazakî) û Hewramkî (Gorankî) bîye. Na hûmare de nê konferansî ser 

o agahdarî estê. 

Weşanxaneyê Vateyî emser amnan û payîzî çendna kitabê neweyî vetî. Sey Omid Esto yê Huseyîn Karakaşî û Kirmancca/Zazaca Dil Dersleri yê Deniz Gunduzî. No weşanxane, bi kitabanê xo yê neweyan ziwan û kulturê ma rê xizmeto muhîm keno. 

Ma çend hûmaranê bînan de zî nuşt ke ma ehemîyetêk xususî danê wendox û nuştoxanê hepsîyan. Heta ke îmkanê ma dest danê ma înan rê kovar û kitabanê xo şawenî (rusnenî). Hepisxaneyan ra zî ma rê nuşte û mektubê ke ser o damxaya “görülmüştür”î esta yenê. No deme-yêk o ke hepisxaneyan ra ma rê mektub û faksê tirkî yenê. Sey yê nînan: 

Ehmed Osman (Entab), Huseyîn Karakaş (Kocaelî), Îsmaîl Olmez (Entab), Murad Canşad (Edîrne), Orhan Bîngol (Kocaelî), Refîq Sunkur (Kocaelî), Serdar Guzelçay (Elbîstan), Seyîthan Akdenîz (Sêrt), Sînan Sutpak (Elbîstan). 

Îdarekerdoxê hepisxaneyanê kolonyalîstan nêverdanê ke hepsîyê kurdî mektuban û nuşteyanê xo yê kurdkîyan bişawî teber. Na neheqî û teda dewlete zî “demokrasî”yê aye û sanika “demokratîk cumhurîyet”î musnena! 

Wendox û nuştoxê ma, kovare ma de kêmîbîyayîşê rexneyan (krî¬tîkan) ra gerre (şîkayet) kenî. Ma nê rexneyanê înan qebul kenî. Raste vanî, bê rexne edebîyat û îlm aver nêşino. Ma hêvî kenî ke no ware de zî tayê gamî bêrîn eştene. 

Weşî û şayî de bimanîn.

Vate