Description

WENDOXAN RÊ

Ma bixeyr dî wendoxê hêcayî, 

Ma nê rojanê tarî û serdinan de, tena bi hûmarêda newîye ney, bi formê yan kî şeklêde neweyî huzurê şima der îme. Ma hêvî kenîme ke keyfê şima pê formê neweyî êno û rexne û pêşnîyazê şima ke estê, ma rê nuşnenê. 

Çîyo ke no dem de zerrîya ma pêrûne vêşnê û hîna kî vêşnena, erdlerzê Wan û dorûverê ey o. Na felakete de bi seyan merdimî heyatê xo vîndî kerd, bi seyan kî bî birîndar. Xesaro maddî zaf girs o. Bi sedhezaran kes bê keye yo. Vatişî ra gore kesê ke cayê xo terk kerdo şîyê, hûmaraya xo resta sehezaran. 

Ma bi nameyê xo û nameyê wendoxanê Vateyî felaketzedeyan rê serweşîye û sebir wazenîme. Dejê înan dejê ma yo. Ma hêvîdar îme ke şarê ma yo fedakar, demêde kilmek de birînanê xo derman keno û reseno cuyêde normal û başî. 

Wendoxê hêcayî, 

Goreyê haydarîya ke resta ma, tayê wendoxê ma, bedelîyayîşê redaksî¬yonî ra dime qismê “Wendoxan rê” ra memnun nîyê. Sebebê ney kî ferqê fekan o. 

Çiqas ke sey redaksîyonê verênî ma kî tekstanê xo bi standardê vateyî nusnenîme kî merdim biwazo-mewazo mabên de tayê ferqî manenê. Mavajîme na cumla yê redaksîyonî verênî ya: “Demêkê dergî dima ma pîya yê.” (Vate nr. 12 (32), r.3) Eynî cumle kirmanckîya vakurî de (fekê Dêrsim û derûdorê ey de) wina bena: “Demêde dergî ra dima ma pîya yîme/rîme.”

Bêguman nê her di formî zî kirmanckî yê, her di zî rast ê. Ganî xo vîrî ra mekerîme, standardîzasyon de ma xeylê mesafe girewto labelê çîyê ke hîna hal nêbîyê ê kî kêmî nîyê. Wendoxê hêcayî va xover bidê, çend hûmaran ra pey çimê xo musenê nê fekî. 

No mîyan de Kombîyayîşê Grûba Xebate ya Vateyî yê 20. virazîya. Îmkanê amadekerdişê nê kombîyayîşî ma rê Unîversîta Artuklu peyda kerd. Seba na hetkarîya hêcaye, bi taybetî zî rektor Prof. Dr. Serdar Bedii Omay û ardimkarê ey û mudirê Enstutîyê Ziwananê ke Tirkîya de Ciwîyenê Prof. Dr. Kadri Yildirimî rê zaf sipas kenîme. 

Heto bîn ra ma waşt ke netîceyê xebata nê kombîyayîşî na hûmare de biweşanîme labelê nêrest, no semed ra kî mend. Ma do hûmara 38ine de biweşanîme. Ancîya zî ma şima bin ra bêxebere nêverdayî. Embazê ma Serdar Bedirxanî no derheq de nuşteyê amade kerd, şima na hûmare de ey vînenê. 

Dergkerdişê qisa hewce nîyo. Seba ke kovarêde bi qalîteya baş û zengîne pêşnîyazê şima wendoxan bikerîme çi ke destbera ma ra ame, peyser nêmendîme ma kerd. Ma hêvî kenîme ke şima ci ra tam gênê û bi keyf wanenê. 

Bi keyf û zerrîweşîye biwanê.

Redaksîyon