Açıklama

WENDOXAN RÊ

Demê şima weş bo wendoxê hêcayî,

Ma rojê zimistanî yê serdin û tarîyî xo pey de verdayî kewtîme wisarî. Bi taybetî kî welatê ke zimistanê xo zor o, teng û zahmetîyê xo zaf ê de, wisar seba şarê ê welatan wayîrê manayêda girsî yo. Merdim şîkîno vajo ke coş û keyfweşîya wisarê nê welatan bêsindor a. Nê welatan de rojê renginî, rojê keyfweşîye û fîrazî têpey de rêz benê.

Welatê ma Kurdîstan kî no het ra xeylê zengîn o. Tawo ke tebîetî giranîya vewre xo ser ra eşte, bî cande; heywanan azo newe ard dînya, velg û vaş bî kewe, şar kî bi eşq û coş silam dano înan, şahîyan keno.

Kulturê miletanê îranîyan de roja tewr muhîme ya wisarî “Newroz” a. Newroze, destpêkerdişê demê ya zî serra neweyî ya. Şar hêvî keno ke demo newe bi hîr û bereket bo. Xirabî û neheqîye dûrî şêro, canweşîye, haştî û birayîye bêro, xoverdayîşê azadîye raver şêro. 

Rojê Newroze verdî ra reyna kî sey redaksîyonî ma wastişê vajîme:

Newroza şima pîroz bo! Seba miletê ma yê mazlumî serra newîye bibo serra xeyr û weşîye, serra hîr û bereketî, serra azadîye!

Wendoxê Delalî,

Na hûmare de kî çiqas ke destebera ma ra ame, ma xover da ke kovarêda zengîne û bi kalîteye pêşnîyazê şima bikerîme. No derheq de çiqas ser kewtîme, teqdîr ê şima yo. 

Na hûmare de şima her çî ra raver netîceyê xebata “Derheqê Kirmanckî de Kombîyayîşê Vîstine” vînenê. No nuşte, hetê embazê ma Malmîsanijî ra ame amadekerdene.

Bêguman, nuşteyo ke bi nameyê “Şêx Evdirehîm û Embazanê Ey” ameyo weşanayene, hetê embazê ma J. Îhsan Esparî ra ameyo amadekerdene û seba na hûmare nuşteyêde sereke yo. Nê nuşteyî de şima xeylê malumat wanenê ke Birayê Şêx Seîdî, Şêx Evdirehîm bi komê embazanê xo ra, seba ke ardim bidê şarê Dêrsimî “Binê Xete” ra se derbazê “Serê Xete” bîyê û se ameyê kîştene. Bi nê nuşteyî tarîxê ma ra pelgêda bîne tarî ra xelesîna û bena roştî.

Wendox û nuştoxê ma Îsmet Sîvereklî na hûmare de zî derheqê Cihudanê (Yahudîyanê) Sêwregi de haydarîye dano.

Alî Beytaş nuşteyê xo “Yilmaz Güney Kam o?”yî de nê hunermendê hêcayî, Alî Aydin Çîçek kî roportajê xo yê “Rêça Muzîkê Kirmanckî de Yew “Rayîrwan”: Soner Soyer”î de dengbej Soner Soyer û CDyê ey ê peyênî “Rayîrwan”î dano şinasnayene. 

Nuşteyê Munzur Çemî “Folklor û Bawerîya Kurdanê Dêrsimî ra.” derheqê folklorê ma yê kanî de tayê nuqtayanê balkêşan ano verê çiman. 

Wendoxê hêcayî,

Tîya de heme nuşteyan ser o vindetiş hewce nîyo. Waştiş û hêvîya ma a ya ke şima hûmara neweye ra hes bikerê, bi keyfweşîye biwanê û cira tam bigêrê.

Weşîye de bimanê!

Redaksîyon