Huseyîn Karakaş, Serra 1968 de, qezayayanê Sêwasî ra Kangal de, “Dewa Derî” de maya xo ra bîyo. Heta çarês serrîya xo dewe de mendo. Dibistane qedênaya, peyê cû ameyo Îstanbul û tîya karanê cîya-cîyayan de se karker gurîyayo. Wexto ke karkerîye kerda kewto faalîyetê sendîkayan mîyan zî. Ey, hetê ra karkerîye kerda hetê ra zî xo bi xo wendo. Çi edebîyatê tirkan ra çi edebîyatê dinya ra bo zaf nimûneyî wendê. Tena eserê edebî ney, zaf eserê sîyasî zî wendê.
Heta serra 1991î mîyanê faalîyet û xoverrodayîşê karkeran de bîyo. 1991î ra pey kewto mîyanê têkoşînê xelisîyayîşê şarê Kurdîstanî. 1996 de Îstanbul de ameyo tepîştene û kewto hepisxane. Derheqê ey de seba dayîşê cezaya îdamî dewa ameya akerdene û na dewa heta serra 2006î dewam kerdo. Peynî de dewaya ey cezaya idamî ra çerixnaya cezaya muebbedî. Nika “Kocaeli 2 Nolu F Tipi Kapalı Cezaevi” de hepsî yo.
Huseyînî serra 1996î de dest bi nuştişî kerdo. Heta ewro kovaranê Ütopya, Yurtsever Gençlik û rojnameyê Özgür Gündemî de nuşteyê ey bi tirkî, kovara Vateyî de zî hîkayeyê ey bi kurdkî (kirmanckî) vejîyayê. Hîkayeyê ke nê kitabî de yê, kovara Vateyî de vejîyayê.
Huseyîn bi tirkî zî hîkayeyan nuseno. Serra 2002yî de “Musabeqaya Hîkaye û Şîîranê Tirkî ya Desine ya Hüseyin Çelebi” de seba hîkayeya xo xelata dîyine girewta.
- Omid Esto, Weşanxaneyê Vateyî, Îstanbul, 2006, 65 r.
- Ez û Ti, Weşanxaneyê Roşna, Dîyarbekir, 2012, 112 r.
- Zere Ra, Weşanxaneyê Roşna, Dîyarbekir, 2014, 102 r.
- Rêça Binbareke, Weşanxaneyê Roşna, Dîyarbekir, 2016, 119 r.
- Hîrê Nameyî, Weşanxaneyê Roşna, Diyarbekir, 2019, 100 r.
- Çê Qemerê Kejî, Weşanxaneyê Roşna, Dîyarbekir, 2021, 184 r.
