Description

Munzur Çemî bi romanê  xo “Gula Çemê Pêrre”yî romannuştişê kirmanckî de yew gama muhîme eşte. Seba ke roman modernîzebîyayîş û hetê nuştişî ra averdeşîyayîşê yew ziwanî nîşan dano bi na xebate kirmanckîya nuştekî gamêna averde şîye. 

Hetê teknîkê romannuştişî ra romanê Munzur Çemî pêt o. Nuştox merkezê mewzûyê romanî ra bi rehetîye kewto dur, ge-ge wextê romanî de tepya şîyo mevzûyê romanî bi no qede kerdo hîra labelê merkezê mevzûyî nê-kerdo vîndî û yewbînragirêdayîşê meseleyan de ser kewto.  Roman de yew xeta dîyare destpêkerdiş ra heta peynîya romanî çiman ver a ya.

Mevzuyê Romanî yew mesela aktuel a. Romanî de şerê Dewleta Tirkan û Kurdan de rewşê dewijanê kurdan êno nusayene. Nê rewşî wendox sey serebûtanê yew kêneka dewije waneno. Cinîbîyayîşê qehremana romanî balkêşbîyayîşê çend xusîsîyetanê romanî ra yew o.

Roman de mekan Kurdistan û Îstanbul o. Romanê kirmanckî de raya verêna ke mekan teberê Kurdistanî de yew şaristano girs o. Roman de rewşê şarê kurdî yê Îstanbulî derg û dila êno nusayene. 

Kirmanckîya romanî xeyle dewlemend a. Nuştoxî roman de kirmanckîya standarde kar arda. Çixa ke destbere ra amayo nuştoxî balê xo do ser ke bi kar ardişê îdyom û çekuyanê tewir-tewiran ziwanî hîna estetîze bikero û no derheq de gelêk zî ser kewto. 

Nuştoxî seba çekuyanê xaman peyê kitabî de yew ferhengêko qij zî nusto.