Description

Çimê ey, seke yew tifing biteqo û bi milyonan guleyî tira biperrê; awirê ey, wina sey gulî ro mi amêne. Nê guleyanê zafan yê awiranê ey ra her yew seke qala yew derdî bikero, wina manadar bî. Germîya tîje, têşanîye, vêşanîye, tayîya yewmîya, vaşo zeliqokin, erdo huşk, tedaya elçîyan, bêwayîrî û bêrêxistini… heme waştişê ey mîyanê ê awiranê tujan de wanîyayêne.
Qedumo ke pê erd kendêne destê rastî de pît zeft kerdibi. Seke nika pê gala dişmenê xo bikero, winî tepîştibi. Destê çepî de, yew qevda pîyazî estebî. Bi ê awiranê sey guleyanê tifîngî, ge ewnîya mi ra ge ewnîya erdî ra û ge ewnîya pîyazê destê xo ra. Seke ramojno ma heme însananê dinya û ma ser de biqîrro; “qîrrika şima ra senî şino war!”