WENDOXAN RÊ

Wendoxê delalî,

Ma bi yewna hûmara kovara Vateyî pîya yê.

Seke yeno zanayene Grûba Xebate ya Vateyî tebaxa 1996î de awan bî. Na grûbe 26 serrî yo bêmabên ziwanê ma ser o xebitîyêna. Grûbe heta nika welatanê cîya-cîyayan de 34 reyî kom bîya. Kombîyayîşo 35. zî tebaxa 2022yî de Dîyarbekir de beno. Heta nika 55 kesî beşdarê nê kombîyayîşan bîy. Çekuyî û termê ke nê kombîyayîşan de tesbît bîy sey di ferhenganê cîyayan amey weşanayene. Grûbe tayê meseleyanê rastnuştiş û gramerî ser o zî bi nameyê Rastnuştişê Kirmanckî (Zazakî) kitabêk weşana. Ma zanê zafaneyê wendoxanê ma muhtewa, hecm û kalîteyê ziwanî ya na xebate ra xeberdar ê. Baş o, ma çirê nê zanayîşan reyna nusenê? Çike na xebata hende serran ser o nê demê peyênî de tayê îdîayê bêbingeyî nusîyênê yan zî vajîyênê.

Nuşteyo verêno ke şima na hûmare de wananê nê îdîayanê nerastan ser o yo. M. Malmîsanijî nê îdîayî hem hetê îlmê ziwanî ra û hem zî hetê rastîya ziwanê ma ra munaqeşe kerdê. Nê munaqeşeyan ra fehm beno ke çîyê ke nê warî de nusîyayî yan zî vajîyayî, zafaneyê înan nege yê eke negeyî nêbîy zî rast nîyê.

Wendoxê delalî,

Profesor Mehmed S. Kayayî êlula 2021î de Weqfê Îsmaîl Beşîkçî de, derheqê kultur û nasnameyî de bi kirmanckî yew derse daya kesanê ke master û doktora kenê. Çarçewaya notanê na derse de, ma rê meqaleyêk şawite. Nasname û kulturî ser o beno ke bi kirmanckî meqaleyanê îlmîyan yê verênan ra yew ba.

Ugur Sermîyanî di kokimanê dêrsimijan reyde 2017 de yew roportajo zaf balkêş kerdo. Nê kokiman ra Musa Guler, wextê roportajî de 98 serre yo. Roportaj hem hetê otantîkîya ziwanî ra hem zî hetê muhtewaya xo ra gelek girîng o.

Ma na hûmare de beşê VII. yê xebata etîmolojî ya M. Malmîsanijî weşanenê.

Na hûmara ma hetê eseranê folklorîkan ra zî dewlemend a. Mistefa Gomayijî yew sanika mintiqaya xo, Aydin Baturî yew deyîra ke yew çewlîgîjî vata, Rohelat Aktulumî mintiqaya Pîranî ra di deyîrî, Ugur Sermîyanî di deyîrî, yew sanike û yew fiqraya mintiqaya Dêrsimî nuştê. Ma na hûmare de yewna meqaleya Menekşe Akalina ke behsê nêweşîyanê psîkolojîkan kena, weşanenê. Nureddîn Celalî rastkerdişê xeletîyêk ser o nuşto.

Hîkayeyê na hûmare Akman Gedîk û Îsmet Borî nuştê. Şîîrê na hûmare zî yê Îdrîs Yazarî û Ozleme Guntaş ê.

Heta hûmara bîne bimanê weşîye de!