Çapa pancine ya hîrakerdîye ya ferhengê Grûba Xebate ya Vateyî TIRKÎ-KIRMANCKÎ (ZAZAKÎ) weşanîya. Ferheng 412 rîpelî yo. Nê ferhengî de nêzdî yewendes hezar çekuyê standardî yê bingeyînî ca gênî. Nê çekuyî hîris û yew Kombîyayîşanê Grûba Xebate ya Vateyî de yew-yew munaqeşe bîyî û sey çekuyanê standardanê bingeyînan qebul bîyî. Seke yeno zanayene Grûba Xebate ya Vateyî 1996 ra heta ewro, serre de yew-di reyî kom bena û termînolojî û çekuyanê ziwanê ma ser o gurîyêna, semedê rastnuştişê kirmanckî qaydeyanê îmla munaqeşe kena û netîceya xebata xo pêşkêşê rayapêroyî kena.

Ma gelek keyfweş îme ke weşanayîşê na xebata erjaya bi qismetê ma. Ma bawer kenîme ke havila na xebate raverşîyayîş û standardîzebîyayîşê ziwanê ma rê gelek a.